ललितपुर, चैत १६ – महानगरीय ट्राफिक प्रहरी महाशाखाले काठमाडौँ उपत्यकामा जथाभावी बाटो काट्ने पैदलयात्रुमाथि मंगलबारबाट कारवाही शुरु गरेको छ ।
जथाभावी बाटो काट्ने र फुटपाथमा नहिँड्ने पैदलयात्रुका कारण उपत्यकामा दुर्घटना बढेको भन्दै ट्राफिक प्रहरीले यो अभियान शुरु गरेको हो ।
डिआइजी मिङ्मार लामाका अनुसार ट्राफिक प्रहरीले यसबारेमा डेढ महिना लामो जनचेतना अभियान चलाएपछि कारवाहीको प्रक्रिया अघि बढाएको हो ।
मंगलबार बिहानदेखि उपत्यकाका विभिन्न स्थानमा ट्राफिक प्रहरीले निगरानी गर्नका साथै कारवाही अघि बढाएको छ ।
ललितपुर ट्राफिक प्रहरीका प्रमुख सीताराम हाछेथुका अनुसार करिब १ घण्टाको अवधिमा मात्र दुई दर्जनभन्दा पैदलयात्रु कारवाहीमा परिसकेको जानकारी दिएका छन् ।
