कतारका विदेशमन्त्री शेख मोहम्मद बिन अब्दुलरहमान अल–थानीले यसको घोषणा गरेका हुन् । इरानले दोहालाई आफ्ना तीनवटा बन्दगरगाह प्रयोग गर्न दिने भएको छ ।
यसबाट कतारले आफूलाई चाहिने सबै मालमत्ता आयात गर्न सक्नेछ ।
साउदी अरब, इजिप्ट, युएई र बहराइनले आफूमाथि लगाएको प्रतिबन्ध सामूहिक सजाय भएको भन्दै शेख मोहम्मदले चिन्ता व्यक्त गरे ।
‘हामीहरू सफल र प्रगतिशील भएकाले एक्ल्याइयौं । हामी शान्तिको वाहक हौं, आतंकवादको होइन,’ उनले पत्रकारहरूलाई बताए ।
कतारले लगभग सबै सामान आयात गर्छ तर शेख मोहम्मदका अनुसार नाकाबन्दी लगाउने मुलुकहरूबाट १६ प्रतिशत सामान मात्र कतार भित्रिने गरेको छ ।
इरानको एक मालवाहक विमानले कतारमा खानेकुरा आपूर्तिका लागि बिहीवार उडान भरेको त्यहाँका सञ्चारमाध्यमले बताएका छन् ।
लोकान्तर बाट
कतारमा नेपाली
खाडी मुलुकहरूमा अहिले अचानक उत्पन्न तनावका कारण कतार एक्लिएको छ । त्यहाँका छ मुलुकहरूले सम्बन्ध बिच्छेद र आर्थिक नाकाबन्दीपछि त्यहाँको अर्थतन्त्र, व्यापार र सुरक्षामा प्रतिकूल परिस्थिति उत्पन्न हुने संकेतहरू देखा परेका छन् । खाडी क्षेत्रमा बढी समृद्ध र आफ्नो आर्थिक सम्पन्नताका कारण बाह्य जगत्मा उपस्थिति बनाउन सफल कतारका लागि यो शुभ संकेत हैन । जुन आरोप अर्थात आतंकवादी शक्तिलाई प्रोत्साहित गरेको आरोप लागेको छ, त्यसबाट आगामी वर्षहरूमा कतारले विश्व समुदायलाई आश्वस्त गर्न नसके ऊ एक्लिने र अन्य कडा कारबाही खेप्नुपर्ने सम्भावना त्यत्तिकै बढ्दोछ । रोजगारी र केही आम्दानीको सुनिश्चितताका लागि कतार नेपालीहरूको आकर्षणको केन्द्र बन्दै आएको छ, विगत दुई दसकयता । अहिले त्यहाँ करिब ५ लाख जति नेपाली कामदार रहेको अनुमान छ ।
कतारले अहिले भोगेको प्रतिकूल परिस्थितिका कारण आउने दिनमा रोजगारीका हिसाबले आम कामदारहरूले नयाँ समस्या भोग्नुपर्ने छ । आगामी ओलम्पिक (२०२२ सन्) को प्रस्तावित आयोजकका रूपमा अति उत्साहसँगै रोजगारीका अतिरिक्त अवसर जुराएको थियो । विगत दुई वर्षमा बढी नेपालीहरूले कतारलाई आफ्नो कर्मथलो बनाउनुको कारण पनि त्यही थियो ।
नेपाल सरकारले अहिलेसम्म कतारमा नेपालीहरूले केही समस्या नझेलेको दाबी गरे पनि सरकारले परिस्थितिको नियमित आकलन गर्नुका साथै परिआएमा आपत्कालीन उद्धार अभियानका लागि तयार हुनु आवश्यक छ ।
कतार एयरलाइन्सको उडान अहिले यथावत छ नेपालमा, तर नाकाबन्दीको सामना गरिरहेको मुलुकले कहिलेसम्म त्यसलाई नियमितता दिन सक्छ, ढुक्क हुने अवस्था छैन । पक्कै पनि कतारको वर्तमान भोगाइका अन्तर्राष्ट्रिय आयाम छन् र त्यसले विश्वको वा अन्य ठूला शक्तिलार्ई ध्रुवीकृत गर्ने सम्भावना छ ।
परिस्थितिले मुलुकभित्र र बाहिर कता कोल्टे फेर्ला त्यो एउटा पाटो हो, तर कतारमा अहिले रहेका नेपालीको जिउधनको सुरक्षा सबै नेपालीको चासो बन्न पुगेको छ, जसलाई आधिकारिक र निर्णायक रूपमा नेपाल सरकारले प्रतिनिधित्व गर्नु र उचित कदम उठाउनु आवश्यक छ । त्यहाँको परिस्थितिले कुन रूप लेला भन्न सकिने अवस्था नरहेकाले सुरक्षापूर्ण फिर्ति प्रक्रिया सुरु गर्न ढिलाइ भएमा त्यसले अनपेक्षित दुष्परिणाम ल्याउन सक्नेछ र त्यसको ठूलो दोष सरकारले लिनुपर्ने छ । annapurnapost
